Säher wagty gapyl bolmaň, ýaranlar,
Dergähler açylar çagdyr bu çaglar.
Rehmete duş geldi bu wagt erenler,
Hak nury saçylar çagdyr bu çaglar.

Asy bolma, günähiňden ýanawer,
Özüň tany, menligiňden inewer,
Ýagşy wagtdyr, toba kylyp, dönewer,
Ýazyklar geçiler çagdyr bu çaglar.

Hak seni saklasyn hijran − ýalyndan,
Azaşmagyn ýolçularyň ýolundan,
Muhabbet jamlary dostuň elinden,
Häzir bol, içiler çagdyr bu çaglar.

Ýüz ýyl gezseň ýalançyny sürübän,
Ten topraga döner bir gün eribän,
Ýokluk meýdanynda mejlis guruban,
Menlikden geçiler çagdyr bu çaglar.

Magtymguly, gitdiň dünýä köýüne,
Jahyllykda köňül goýduň oýuna,
Imdi aýak basdyň otuz öýüne,
Göz ýaşy saçylar çagdyr bu çaglar.