Resul damadydyr, Öz arslanyňdyr,
Ýa ymam Alyýa bagyşla bizi.
Çeşmi-çyragymdyr, nury-aýnymdyr,
Ýa ymam Hasana bagyşla bizi.

Ýalan dünýä kime berdi wepany,
Ahyretde anlar sürer sapany,
Şymr ile ol Ýezit berdi jepany,
Ýa ymam Hüseýne bagyşla bizi.

Nasry-Seýýar, Merwan-Hekem döwründe,
Ymamlar galdylar jepa-jöwründe,
Çaýa atdyrdylar Dymaşk şährinde,
Zeýnelabydyna bagyşla bizi.

Patmaýy-Zähradyr onuň enesi,
Zatynda bir zerre ýokdur günäsi,
Humaýun dagydyr ahyr binasy,
Muhammet Bakyra bagyşla bizi.

Kemaly pelekden, aşypdyr Arşdan,
Başa goýdy jeddi geýdigi täçden,
Üç keramat bile galdy Hajjajdan,
Ýa ymam Jagfara bagyşla bizi.

Kim biler işiňde niçiksi syr bar,
Akl oňa yetişmez gudratly Jepbar,
Duşmanyga dostuň etdiň giriftar,
Ýa Musa Käzime bagyşla bizi.

Deň-duşlar ýanynda bir bikemalam,
Aşygam, mejnunam, şikeste halam,
Synaýy-Horasan, zuwwary-älem,
Ýa ymam Ryzaýa bagyşla bizi.

Ymamlar yşkynda maňa bergin jam,
Açaýyn zybany, okaýyn Kelam,
Ilähi behakky-Patmaýy-kyýam, 
Muhammet Takyýa bagyşla bizi.

Dünýäde çekdiler ýüz derdi-dagy,
Magşar gün münerler saýlap Byragy,
Hakykat ýolunyň şemi-çyragy,
Alyýýyn-Nakyýa bagyşla bizi.

Ýakyn köňül birle muştagam-bende,
Ýadyňyz eýlärem tä bar men zinde,
Ady Günden meşhur olmuş älemde,
Ýa ymam Esgere bagyşla bizi.

Kap dagyndan ýol açylsa Ýajuja,
Dünýä ýüzi dolar zulm ile güýje,
Zaman ahyrynda geler hyruja,
Ýa Sahypzamana bagyşla bizi.

Magtymguly aýdar, men häki-paýam,
Ymamlar ýolunda hem jan pidaýam,
Kemine bendeýem, gelip-gideýem,
Ýa Apbas Alyýa bagyşla bizi.