Meňli hanym golun dişläp,
Bizden ki uýat eýleýir.
Kä daranyp, uz ýörişläp,
Bizden ki uýat eýleýir.

Aşyk, gulak goýgul söze,
Syýa zülp ýaraşar ýüze,
Sürme çalyp gara göze,
Bizden ki uýat eýleýir.

Geýipdir gyzyl-ýaşyly,
Bilmen nedir ýar hyýaly,
Göz edip ýomut, ahaly,
Bizden ki uýat eýleýir.

Ykbal çapmaz ýöreý diýsem,
Ýokdur malym, bereý diýsem,
Aç, roýuňy göreý diýsem,
Öwrülip uýat eýleýir.

Görüşeli, Meňli hanym,
Ustuhanym, şirin janym,
Pyragy diýr, din-imanym,
Ýetdirmez, uýat eýleýir.