Eý, ýaranlar, eştse Lukman derdimiň bu halyny,
Terk eder ki külli watan, unudar ol ýoluny.

«Hüw» diýip, men zary-efgan gije-gündiz aglaram,
Ger eşitse zarymy, Karun unudar pälini.

Gara daglar katra-katra ýaş döküban halyma,
Döredipdir ulug umman, Nuh ýüzdürer salyny.

Jan şährine saldy talaň, geldi leşger tug bilen,
Bilmenem, ol çözermikän bu watan ykbalyny?

Aýdyň ol ýaryma meniň zyndan içre bolanym,
Saçlaryny sallaýyp, kylsyn azat men guluny.

Magtymguly, adyň seniň külli äleme dolup,
Kylsa adam baryn gapyl, gizle, berme bu malny.