Bir gije ýatyrdym tünüň ýarynda,
Bir dört atly gelip: «Turgul»  diýdiler.
«Habarmyz bar saňa pursat jaýynda,
Şol ýerde ärler bar, görgül» diýdiler.

Nazarym ýetişgeç şol dört merdana,
Köňlüm joşa geldi, başym gerdana,
Şol wagtda bar idi iki diwana:
«Durma, oglan, onda bargyl!» diýdiler.

Şol iki diwana tutdy golumdan,
Alyban gitdiler duran ýerimden,
Bir yşarat boldy şol wagt ýanymdan:
«Saýramda baryban durgul!» diýdiler.

Oturypdyk, geldi iki pirzada,
Gözünden ýaş akar, dili dogada,
«Hüw, Hak!» diýip çykdy alty pyýada,
«Adam indi geler, görgül!» diýdiler.

Bir dört atly geldi, bary sebzebaz,
Hasalary ýaşyl, aty teblebaz,
«Mejlis halkasyny gurmaň beýle az,
Adam köpdür, ulug gurgul!» diýdiler.

Daşdan çykdy altmyş atly, gördüler,
«Muhammet!» diýp, bary garşy bardylar,
Saglyk-salamatlyk bir-bir sordular,
«Durmaň, ulug jaýa ýörgül!» diýdiler.

Bir atyň ardyna meni aldylar,
Saýramda – şol jaýa baryp durdular,
Tamam oturdylar, mejlis gurdular,
«Oglan − maňa − ara girgil!» diýdiler.

«Alydyr» diýdiler, tutdy destimden,
Borýa düşegimi aldy astymdan, 
Men bilmedim, bir zat guýdy üstümden,
«Ýolugan döwrandyr, sürgül!» diýdiler.

Haýdardan soradym barça atba-at:
«Hezreti pygamber − oldur, bolma ýat,
Ol − Eslem hojadyr, ol − Baba zürýat,
Ol − Weýsel Karandyr, bilgil!» diýdiler.

«Ol − Bahaweddindir, ol hem bir ärdir,
Biri Zeňňi Baba ol-da namdardyr,
Ol söýenşip duran dört çaryýardyr,
Maksadyň ne bolsa aýgyl!» diýdiler.

Şol wagtda duran birki şyhy-şap,
«Bu oglana pata beriň – diýdi – sap –
Ýüz ýigrimi dört müň enbiýa, eshap,
Barysy şolardyr, bilgil!» diýdiler.

Resulalla aýdy: «Ýa, Şahymerdan,
Eý-ä, Eslem hoja, ýa, Baba Selman,
Abu Bekr Syddyk, ýa, Omar, Osman,
Bu guluň maksadyn bergil!» diýdiler.

Eslim, Baba Selman buýurdy merde,
Pyýalany tutup, saldylar derde,
Gitdi akyl-huşum, ýatdym şol ýerde,
«Arşda-ferşde ne bar, görgül!» diýdiler.

Ýel boldum, ýüwürdim ýeriň damarna,
Nazarym ýetişdi Arşyň kemerne,
«Jebrut äleminde Jelil syryna –
Gelip, özüň garap görgül!» diýdiler.

Näge hyýal etsem, ele getirdim,
Nägä baksam, oňa nazar ýetirdim,
Bu hal ile men parahat ýatyrdym,
Ýüzüme tüýkürip: «Tur, gul!» diýdiler.

Resulalla aýdy: «Eshaplar, ýörüň,
Oglany uzadyň, bir pata beriň»,
Buýurdy dört atla: «Eltip tabşyryň,
Getiren jaýyňda goýgul!» diýdiler.

Turup Magtymguly gözün açypdyr,
Serine ne küýler gelip geçipdir,
Esrek ner dek ak köpükler saçypdyr,
«Oglan, Alla ýaryň, bargyl!» diýdiler.