Bu çölde rehm eýle garyp halyma,
Älemi ýaradan, Suhan, şypa ber.
Çoh yzaly, dertli şirin janyma,
Ýa Mustapa − Fahry-jahan, şypa ber.

On iki ymam, biri-birinden serwer,
Ýedi weli, ýaran bolup, medet ber,
Meşhet, Gara Baba, ýa Şis pygamber,
Hasan, Hüseýn, Şahymerdan, şypa ber.

Nuh pygamber, nazar eýle bir nepes,
Ömrümi bihuda geçirdim – hebes,
Zekerýa pygamber, ýa, Hydyr, Ylýas,
Kowus, Kyýas, Musa Ymran, şypa ber.

Ybraýymyň jandan aýryldy taby,
Käbä baran hajy tapar sogaby,
Gara Älem ata, ýa Halat nebi,
Gözli ata, Baba Selman, şypa ber.

Ogul döwletini bermän Eýesi,
Yzynda bir nyşan ýokdur − nowasy,
Döw-periniň, ynsyň, jynsyň patşasy,
Soltan bolan şa Süleýman, şypa ber.

Özüň dogry gözle, ýa Repbim Jelil,
Barçanyň ryzkyna Sen Özüň kepil,
Ýa Dawut, ýa Jirjis, Ybraýym Halyl,
Abu Bekr, Omar, Osman, şypa ber.

Dat eýläp, dilimden kyldym pyganlar,
Ýaş ýerine akdy gözümden ganlar,
Horezm ýurdunda ýatan jananlar,
Ismi Mahmyt – är päliwan, şypa ber.

Möwlam, ýetir mesgenime, ýurduma,
Ýüzüm düşsün arslanyma, gurduma,
Magtymguly aýdar, meniň derdime,
Dünýäniň tebibi – Lukman şypa ber.