Gözüme hergiz Sensiz görünmez jahan, eý, dost.
Ne jahan, belki, tende bolsa ger set jan, eý, dost.

Dostlaryga bu işler biwepalyk ermesmi?
Jana jebriň artdyrdyň açdykça zyban, eý, dost.

Ol ki ruhsaryň görüp, köňül gopdy sen ýara,
Jan bermeý gutulmak ýok, hiç oňa imkan, eý, dost.

Waslyňa umyt eden üzmüş elin janydan,
Çeşmiň − jellady-jahan, gaşyňdyr keman, eý, dost.

Destury-zaman budur, mazluma mürwet berler,
Şererge şowkuň artar, etdikçe aman, eý, dost.

Umytly aşyklara wasl umydyn katg etdiň,
Aşyklara jebr ondan bolgaýmy bu ýan, eý, dost.

Magtymguly, bir mahluk, men aşygam, sen – magşuk,
Ger diýseň: «Istegim ýok», baraýyn kaýan, eý, dost.