Pelek-älem ryswa kyldy, aýyrypdyr zarymdan,
Ne iş kylsam, habar bilem men ol Meňli ýarymdan.

Yns-jyns tugýan eýläp, zemin lerzana gelmiş,
Asmanlar jünbüş kylyp, köwkep ýanmyş narymdan.

Bir rehimsiz şa eripdir, göwnüm içre jaý tutup,
Bent eýleýipdir Lukmany, habar almaz azarymdan.

Günde bir wagt nazar salmaz, agdy serden derdimiz,
Jismim häkister boldy, janym düşüp kararymdan.

Erse gyrgy pany dünýä bermez başda täjini,
Hiç uýalmaz, handan kylar, gorkmaz meniň nazarymdan.

Güzerimi bendi kylsam, her günde kyrk açadyr,
Aby-köwser zülalymy içipdir ol güzerimden.

Ýanar otly Magtymguly, ot lybasyn sen geýip,
Pany jahan otlaýyp sen, dilde bolan naryňdan.