Laçynsyz çöl ýerde galan maslyk men,
Meni görüp, läşler aglar halyma.
Dünýä gadryn bilmez nadan mahluk men,
Akly gidip, başlar aglar halyma.

Sepil boldum, jümle jahany ýörip,
Gapyl galdym, gam öýünde sargaryp,
Uça bilmän, ýaşyn döküp telmuryp,
Sergerdana guşlar aglar halyma.

Kuwwatsyz galyp men, neçün çaşmaz men,
Haýrany men, bent astynda daşmaz men,
Nar üstüne düşdüm, ýanyp-bişmez men,
Kebap bolup, çişler aglar halyma.

Takatsyz ýüregim lerzana döndi,
Ah ursam, tütünim dumana döndi,
Gözden döken ýaşym ummana döndi,
Düwme-düwme ýaşlar aglar halyma.

Nalamdan, gör, daglar lagly döredi,
Bulutlar dargady, baran ýöredi,
Gara daglar suw-sil boldy, eredi,
Ol biçäre daşlar aglar halyma.

Magtymguly, bentdir akyl gapysy,
Dert bolupdyr, iliň-günüň ýapysy,
Zeberdest pirleri, işan-sopusy,
Telpek geýmiş, peşler aglar halyma.