Aşyky-ezel men, sonam, men saňa,
Ne edep-erkan bar, ilden uýalmak.
Iltifat etmediň hergiz sen maňa,
Eýlemez bu işi bir gara galpak.

Meniň deý yşkyňda çohlar sen ýaryň,
Gündiz giriftaryň, gijeler zaryň,
Ömrüm paýmalyňdyr janym nisaryň,
Bolsaýdy waslyňa bir çäre kylmak.

Eger ki hiç isem, sana geler men,
Höşk ustuhan isem, gana geler men,
Murda set sal isem, jana geler men,
Bolsaýdy bezm içre bir ýada salmak.

Ahym şererinden üýn salyp otlar,
Bardylar dergähe eýleýip datlar,
Eridi, ap oldy jümle jematlar,
Öňden-soňa barmy hiç beýle bolmak.

Bendäňem, ger diýseň: «Nan beren alsa»,
Mydam mätäjiň men, kän beren alsa,
Ger zowky-wysalyň jan beren alsa,
Ýaraşar Pyraga jan berip almak.