Dertliler derdimi görse, utanarlar özüden,
Tebip ähli çäre tapman, hunlar dökerler gözüden.

Görse aşyklar bu ody, unudar öz ataşyn,
Çykar dag-u daşlar üzre, Mejnuny tapmaz düzüden.

Bir taryna ýarymyň ähli musulman tussagy,
Kapyrlar istäp adalat, zarlap ýörerler yzydan.

Eştse Nowaýy, Nyzamy, Firdöwsi kylan zarym,
Terki-dünýä eýleýip, barysy geçer sözüden.

Gijeler nala çekip, gündiz umydym ýok meniň,
Doýmaýar bu aç gözlerim bakyp ýaryň ýüzüden.

Pyragy, sen sabyr eýläp, unut gyşyň paslyny,
Ger unutsa ki bu güni, peýda görmeý güýzüden.