Hak ugrunda gurbandyr,
Janym, döwletim, malym.
Göwün ýola rowandyr, 
Hindistanda hyýalym.

Ýyglap, gözüm ýaş etdim,
Göwün içre nagş etdim,
Il-günüme bagş etdim,
Zyban içre asalym.

Durdum adam sanyda,
Garamatyň ýanyda,
Bir gardaşsyz, panyda,
Niçik öter ahwalym.

Ol peýkeri haraýym,
Bagyş kyldym saraýym,
Puş eýledim, gör, roýum,
Göterip men desmalym.

Ýördüm jebir köýünde,
Ýandym yşkyň öýünde,
Galdy zemin teýinde,
Daýym berilen pälim.

Janym ataşa saldym,
Nar içinde men galdym,
Yşkdan ýaradar boldum,
Lukman soramaz halym.

Il gözüne ilip men,
Ilenimi bilip men,
Ýar gaşyna gelip men,
Nä diýerem − delilim.

Pany-jahan içinde,
Peýkam keman içinde,
Mejnun umman içinde,
Gark bolmuş esgi salym.

Bir perige hyrydar,
Bu janym oňa nisar,
Diýdim ýara: «Arzym bar»,
Unutmyşam sowalym.

Meňli jana ot salar,
Ody jismimde galar,
Magtymguly, uýalar
Meniň sahypjemalym.