Girsem baryp söwer dostuň bagyna,
Asman galyp, ol gülgüzar oýnaşar.
Seýran etsem duman basan dagyna,
Hemle urup, iki şamar oýnaşar.

Iki maral aby-köwser güzerde,
Men pakyry örtäp nuran[1] nazarda,
Yşk söwdasy rowaç tapan bazarda,
Satan bilen ol hyrydar oýnaşar.

Girdim baga bütin dünýä harç edip,
Bakdym güle, arman bilen hyrç edip,
Güller bilen bilbil birge möwç edip,
Alma-enar, injiri-nar oýnaşar.

Ýagşy sözler jaý eýleýir dil içre,
Närse gaçsa, dura bilmez sil içre,
Är ýigitli, berkararly il içre,
Hiç oňuşmaz namys-u ar oýnaşar.

Pelek gezer hijran-hemle atyşyp,
Namart ýörmez mertler bilen gatyşyp,
Magtymguly Meňli ýara sataşyp,
Bäş gün biziň bilen gül ýar oýnaşar.

[1] Nuran – nurana, nurly.