Bir käkilik aldyrsa zürbe balasyn,
Saýraý-saýraý, gözlemeýin bolarmy?
Bir bilbil ýitirse gyzyl lälesin,
Hasratyndan sözlemeýin bolarmy?

Kürresi elinden gitse eşegiň,
Telmuryp dört ýana, bakar uşagyn,
Akmaýa aldyrsa elden köşegin,
Bagryn ezip, bozlamaýyn bolarmy?

Bala sesin diňlär, salyp gulagyn,
Döke-döke göz ýaşynyň bulagyn,
Bir jeren aldyrsa elden owlagyn,
Mäleý-mäleý, yzlamaýyn bolarmy?

Agsagyň elinden alsaň agajyn,
Ýaman derde düşer, tapmaz alajyn,
Bir güýçli duşmana duşsa mekejin,
Jojugyny gizlemeýin bolarmy?

Aýralyga adam ogly neýlesin?
Kim galar görmeýin ajal hilesin,
Magtymguly haýwan bilse balasyn,
Ynsan bagryn duzlamaýyn bolarmy?