Ýörseň, ýarym, guwanar men,
Serwi kamat boýlaryňa.
Gülden puşeş ýaraşypdyr,
Ajap rahat boýlaryňa.

Men − bilbile eýläp azar,
Aldyň şirin janym nisar,
Züleýhadan galan zünnar,
Bolsun hajat boýlaryňa.

Görsem roýuň, ýok armanym,
Sensiz hazan ursun janym,
Ykbalym, dinim-imanym,
Kylam hormat boýlaryňa.

Yşkyň bilen men dat eýläp,
Öwrenip men, adat eýläp,
Ömür-ahyr perýat eýläp,
Ýetmez lahap boýlaryňa.

Gören aşyk pida bolar,
Il-gününden jyda bolar,
Magtymguly geda bolar,
Din-keramat boýlaryňa.