Meňli hanym, eýýamyňdan gorkup, bara bilmeý boldum,
Göz bilen gara gaşyňdan gola düşüp, bendi boldum.

Jellatlar men bendi guly zynjyr bilen bent eýleýir,
Ger ki sen-de goldamasaň, nalaç eziz jan neýleýir.

Nesimi dek soýup meni, seglere şam kylar indi, 
Läş üstünde garaguşlar jeňňi-söweş salar indi.

Ustuhanym ýel sowuryp, weýil jaýa wasyl eýlär,
Bendi galan eziz jany bil, dowzaha hasyl eýlär.

Dowzah meni ýaka bilmez, berer zülpüň bir taryna,
Tor içinde saklap meni, gowşyr ýylçyr ol maryňa.

Ol mar kowup jülgelerden, şeýtan bilen kylar hemra,
Kylgyl azat, Meňli hanym, men misgini kylma gümra.

Magtymguly ismiň seniň, bolsun gerekdir Pyragy,
Mar golundan dyndym diýsem, geldi hijranyň ýaragy.