Bu ne bela, bu ne hasrat, ne gowga,
Rehm eden bolmady, bagtym garadyr.
Nalyş etsem, arzym ýetmez ol Huda,
Rehm eden bolmady, bagtym garadyr.

Pelek dost bolupdyr alagöz bile,
Derdimi diňlemez, diýsem söz bile,
Ilimi ugratdy dagy-düz bile,
Rehm eden bolmady, bagtym garadyr.

Görogly dek gaýratymdan aýryldym,
Gojalyp men, kuwwatymdan aýryldym,
Iki didäm − zürýadymdan aýryldym,
Rehm eden bolmady, bagtym garadyr.

Şam-u säher ýata bilmen parahat,
Ýüregim telmurar, göwün bitakat,
Käbäm, kyblam, gardaş boldular wepat,
Rehm eden bolmady bagtym garadyr.

Pelege duşan aw gaçyp gutulmaz,
Tartan oky adam ogly, atylmaz,
Ýeke äriň ömür ady tutulmaz,
Rehm eden bolmady, bagtym garadyr.

Deňim-duşum her bir käre bulaşdy,
Dostlar yrak düşdi, hijran dolaşdy,
Yhlasym, myradym gama ulaşdy,
Rehm eden bolmady, bagtym garadyr.

Başyma şum pelek her gün sürüner,
Ýowuz düşen göwre kime direner,
Ýamanlar gözüme eziz görüner,
Rehm eden bolmady, bagtym garadyr.

Sarwanym azaşdy, dargady malym, 
Ykbalym keç turdy, gitdi hyýalym,
Altmyşa azm urdy gartaşan salym,
Rehm eden bolmady, bagtym garadyr.

Gama erkim berdim, huşum dargatdym,
Saraý – weýran, kerwenimi ugratdym,
Meňli hanym − yşk söwdasyn unutdym,
Rehm eden bolmady, bagtym garadyr.

Bu dünýä çohlara bipeýan boldy,
Garyp golun serdi, gury san boldy,
Namartlar mert boldy, ile han boldy,
Rehm eden bolmady, bagtym garadyr.

Ah, neýleý, ötürdüm ýigitlik çagym,
Daragty gurady, boş galdy bagym,
Dumany sowuldy, eredi dagym,
Rehm eden bolmady, bagtym garadyr.

Magtymguly, ýetmez ýyglap kararym,
Boş galdy dükanym, dargady barym,
Paý astyna düşdi namysym-arym,
Rehm eden bolmady, bagtym garadyr.