Sap tutuşyp, haýbat atar tilkiler,
Arly peleň, öler bolsaň, öl indi.
Aryp bolup, mest bolupdyr telkiler,
Dana molla, biler bolsaň, bil indi.

Ýalaňaç geýinip, açlar doýupdyr,
Karun toba eýläp, pälin goýupdyr,
Nadan: «Gurhan şuny diýer»... diýipdir,
Gurhan, söweş salar bolsaň, sal indi.

Bir söz bilen köýen bagrym ýandyrdyň,
Jigerden aýyrdyň, başdan dyndardyň,
Ýüz görkezmän, hoş söz bilen gandyrdyň,
Näzli ýarym, geler bolsaň, gel indi.

Magtymguly çaşyp, lala dönüpdir,
Ýandy teni-jany, küle dönüpdir,
Ady il içinde gula dönüpdir,
Hoja, seýit, biler bolsaň, bil indi.