Ýaman ýagşa ýoldaş bolsa,
Awulyk içen ýalydyr.
Aýryla bilse awusy,
Içinden öçen ýalydyr.

Adam şerm etmez rişinden,
Gorkar ýatanda düýşünden,
Eýýama baksam, işinden,
Bu köňlüm geçen ýalydyr.

Bedasyl ykbaly ýörmek,
Öýsüz eline mal girmek,
Akmaga syryňy bermek –
Öz aýbyň açan ýalydyr.

Ötdi ömrüň – dünýä seýliň,
Hak ýoluna bagla biliň,
Agzy ala bolan iliň,
Döwleti gaçan ýalydyr.

Gep aňtap, görende gizlän,
Akyldyr – iş soňun gözlän,
Gepin tapyp, ýagşy sözlän,
Misli dür saçan ýalydyr.

Ärden gitse ygtybarlar,
Sowar ondan dost-u ýarlar,
Hünärli, ykbally ärler,
Mal-u pul uçan ýalydyr.

Magtymguly, yllatly göz, 
Haraba döner degse duz,
Märekede bir jaýsyz söz,
Çermenip ... ýalydyr.