Anda adam saýylar,
Hezarystana sary.
Pelek bakgal ötürmiş,
Bazarystana sary.

Gara ýer agzyn aça,
Gapyldyr adam, geçe,
Bilbiller istär – göçe,
Bagy-bossana sary.

Nurata, Baba Dargan,
Degresi derýa, gorgan,
Bardyk saýy Bakyrgan,
Şol Türküstana sary.

Hakdan rehmet sepiler,
Ymaratlar ýapylar,
Gitseň Käbe tapylar,
Rumystana sary.

Gündogardan günbatar,
Tersa, jöhit hem tatar,
Şäherler hatar-hatar,
Magrybystana sary.

Aşyk aýdar: «Ýa, Suhan,
Müşgilim kylgyl asan,
Şepagat eýle, ýaran,
Şol Dehistana sary!»

Magtymguly dillener,
Gözde ýaşy sillener,
Günde göçdür, ýollanar,
Mazarystana sary.