Ýagşynyň gadryn il bilmez,
Ýagşylar daşda bellidir.
Möwlam nazar salsa kime –
Bolajak başda bellidir.

Pynhan ýer diýp etme günä,
Gol-aýagyň bolar güwä,
Ile pynhan, Haka ägä,
Asl adam işde bellidir.

Bu dünýäde maldyr görküň,
Her bir ýere ýeter erkiň,
Öýünde lap urar her kim,
Batyr söweşde bellidir.

Hynany ýaksaň, reň bolar,
Gyzyly sökseň, seň bolar,
Hemme bedewler deň bolar,
Bedew çapyşda bellidir.

Hoja, seýit selasatly,
Pakyrlara delalatly,
Hoş tebessüm, mylakatly –
Her kim deň-duşda bellidir.

Magtymguly, şowkuň güni,
Ýagşydyr yslamyň dini,
Ýene has gözeliň syny,
Göz bilen gaşda bellidir.