Ýagşylygy pis bilmez – 
Är ýanynda bellidir.
Görer gözüň gymmaty,
Kör ýanynda bellidir.

Däli köňül daýanjy,
Ýokdur dünýä ynanjy,
Sag gulagyň guwanjy,
Ker ýanynda bellidir.

Eger garry, eger ýaş,
Kylma syryň halka paş,
Syr saklagan mähek daş,
Zer ýanynda bellidir.

Bu dünýäniň myrady –
At, zagyf hem zürýady,
Arwananyň kuwwaty,
Ner ýanynda bellidir.

Bolsa gamdan halasym,
Ýaza dönse gyş paslym,
Magtymguly, yhlasym,
Ýar ýanynda bellidir.