Pelek karardan düşüp, pida bolmuş zaryma,
Bir ajaýyp zyba peri, girmiş yşk bazaryma.

Her görenler hyrydardyr, şahy-geda hem guly,
Merdi-namart hem-de näkes söz ýetirer ýaryma.

Kyla bilmen pynhan ony, dözmeýär ejiz köňül,
Ger äşigär kylsam ýüzün, gören duşar gahryma.

Asly behişt sünbülidir gül ýüzünde zülpleri,
Erem içre biten narlar ogşamaz bu naryma.

Gelen derdini men alyp, hüwler çekiban gezerem,
Lukman gelip, göz aýlaýyp, çäre kylmaz azaryma.

Diýr Pyragy, mert menem, äşgär ile mertligim,
Diri gitmez gaşlarymdan degen namys-aryma.