Daglar goja galsa, derýalar — silsiz,
Ýa, Repbim diýerler, ýaşlar içinde.
Dahan ýalňyz düşse, bir barmak dilsiz,
Ne çäre eýlesin dişler içinde.

Garry güýçden galar, ýigitler – huşdan,
Saýýat awdan galar, laçynlar – guşdan,
Şada akyl bolmaz, akmaklar başdan,
Köp hyýal kylarlar düýşler içinde.

Dokuz kelam okan iliň sopusy,
Jaýy belli imes, kanda gapysy,
Iki göws arasy — juwan sapasy,
Garaguş mekany läşler içinde.

Tokaýlar bir zaman peleňsiz bolmaz,
Hindi jandan öter, pilinden galmaz,
Gazak geçi söýer, goç, gäwmiş almaz,
Mekany bolarmyş göçler içinde.

Magtymguly, sakla uzyn diliňi,
Ýerin tana, mäkäm bagla biliňi,
Bahar pasly öwüsdirme ýeliňi,
Ýel mekany bolar gyşlar içinde.