Garyp göwnümiň binasyn,
Gör, pelek weýran eýledi.
Aldyryp goldan namysyn,
Kalbymda arman eýledi.

Hakdan bize döwlet gelse,
Ýyglan gözler oýnap, gülse,
Misginler ýurt gadryn bilse,
Ýürekde hijran eýledi.

Mert ýigit bolsun gardaşyň,
Bolmasa, hiç galmaz başyň,
Aýyp tapyp, bil, syrdaşyň,
Illere aýan eýledi.

Aty gerekdir mertleriň,
Erse ady ýok gurtlaryň,
Bakja-saraýly ýurtlaryň,
Jaýyny meýdan eýledi.

Magtymguly, akly çaşan,
Sözläp gidermi gartaşan,
Daň säher çagy arlaşan
Peleňler seýran eýledi.