Saglygyň gadryny bilgil, hasta bolmasdan burun,
Hastalyk şükrüni kylgyl, täki ölmesden burun.
Düz ýeriň gadryny bilgil, derýa dolmasdan burun,
Gämide hüşgär oturgyl, girdaba gelmesden burun,
Ýaşlygyň gadryny bilgil, tä ulalmasdan burun.

Ulaldyň – köňlüňdedir ýalan jahanyň söýgüsi,
Gözleriň gözel görüp, seni günähe goýgusy,
Dilleriň gybat kesip, lap-ýalan sözler aýgysy,
Hatyryň ýüz-müň perişan, kethudalyk gaýgysy,
Ne ajap hoş hal idiň, özüňi bilmesden burun.

Ýaradan ýadyňdadyr, başyň ýaman halda eken,
Ýüz gün ötse, ýada düşmez, belli hoş halda eken,
Ömrüňi bihuda tutma, pursatyň elde eken,
Degse bir bady-hazan, soldyr seni gülde eken,
Gülni ýadyňdan çykarma, täki solmasdan burun.

Akly-huşuňa ýetişdiň, eýlediň seýrany sen,
Istär idiň jem edem, bu küllühüm Eýrany sen,
Iýmediň bir dem parahat Taňry beren nany sen,
Heý, habaryň barmydyr, bu jahanyň myhmany sen,
Azygyň taýýary kyl, kerwen çekilmesden burun.

Galmamyş bu köne dünýä Rüstem ile Zalyňa,
Garra bolma iki günlük iýgu-içgu, malyňa,
Hakykat arypy gör, atlasy berdi şalyňa,
Tur säher, Magtymguly, ýygla bu gün öz halyňa,
Erte, ol magşar güni derläp uýalmasdan burun.