Eý, ýaranlar, bilmek olmaz,
Ne iş geler başymyza.
Görüň bu gahba pelegi,
Awy goşar aşymyza.

Ajal geler, agzyn açar,
Inçe biller zemin guçar,
Gülüp gelen aglap geçer,
Rehm etmez gözýaşymyza.

Daýanmaň bagta, ykbala,
Dolanar ýüz müň hyýala,
Ygtybar ýok genje, mala,
Dünýä meňzär düýşümize.

Pelek bize egri bakyp,
El uzadyp, efsun okyp, 
Orta ýerde däne döküp,
Tor gurupdyr daşymyza.

Magtymguly, barsaň mundan,
Haýyr-şer sorarlar senden,
Şirin jan aýrylsa tenden,
Gum guwanar läşimize.