Ýaňňy halym tagna kylyp, bak, kibir etdiň meni,
Ýow-le üflaslara menzil-mekandar etdiň meni.
Gurby giden dyzlarma bigadyr bar etdiň meni,
Kuýaşymy bent kylyp, dünýäge zar etdiň meni,
Biwatan namartlara bagşy-diýar etdiň meni.

Hana içre bent eýleýip, ryzkym Karuna berip,
Çyn-Maçyny, Rum, Horezmi ýördüm ykbal agtaryp,
Ötdi ýazym, geldi gyşym, galdym indi sargaryp,
Beýtullanyň jaýy içre hasyl boldum köp ýörip,
Zaglar gonan gülleriňde, neýleý, anbar etdiň meni.

Yşk ataşyn isteýip bir girýany perwana men,
Gähi yşka bolsam duçar, közüne birýana men,
Mejnun kibi Leýli ýaryň roýuna girýana men,
Akly çaşan, bagty ýatan, bir misgin bigäne men,
Daga urup dargaýan ummanda lemmer etdiň meni.

Saraýymy bada berip girdim Jeýhun bahryna,
Lemmerleri azm urup atlandylar gahryna,
Guwwas kibi ýüzüp çyksam, duşdum aždar zährine,
Hazan uran kemine men, han kyldy Lutuň şährine,
Tagt ornuna nar üstünde Ispendiýar etdiň meni.

Daga-daşa takat bermeý, gezdim derman isteýip,
Uçdum suýy-asman üzre men Süleýman isteýip,
Hemra isläp däli-diwan men natuwan isteýip,
Hökm eýlediň Ybraýyma sen ki gurban isteýip,
Şol Ybraýym goly içre, neýleý, pur etdiň meni.

Tanybilmez boldy serim, altynmy sen, zermi sen?
Ýa ki Karun merjeni sen, ýakutmy sen, dürmi sen?
Gül-gunçamy ýa ki baldak, ýa ki ýaprak, permi sen?
Aždarmy sen, jellatmy sen, ýa ki toprak, ýermi sen?
Mert eripdim, kylyp namart, ile güftar etdiň meni.

Dynmaýan men, ötüp ömrüm bu pelegiň jebriden,
Saldy leşger jem kylypdyr, çykdym gaçyp şähriden,
Lukman ýüze tartmyş perde men pakyryň zarydan,
Magtymguly, men geçmişem dünýä − her ne barydan,
Ol Isaga bagyş kylmaý, namarda har etdiň meni.