Abdal maňa ebet jamyn sunaly,
Metjit haýsy, mährap haýsy, bilmedim.
Ol güdazda janym erip ýanaly,
Abat haýsy, harap haýsy, bilmedim.

Bir tabeşe tap etmedim, toz boldum,
Toprak boldum, ataş boldum, suz boldum,
Daşdan bişdim, içden köýdüm, köz boldum,
Ki nar haýsy, kebap haýsy, bilmedim.

Güzer etdim bir mekansyz mekana,
Seýran etdim bir meýdansyz meýdana,
Haýran galdym bir jahansyz jahana,
Beýt haýsydyr hem bap haýsy, bilmedim.

Nebse uýdum, özüm bilmeý, hyrs boldum,
Akyl işin dogry sandym, ters bildim,
Her eşýadan Ýar sypatyn ders aldym,
Gurhan haýsy, kitap haýsy, bilmedim.

Magtymguly ol mekanda meks etdi,
Şyhlar turdy, ýigitler deý raks etdi,
Her eşýadan Ýar jemaly eks etdi,
Ab haýsydyr, şerap haýsy, bilmedim.