Kimsäm bardyr, ýara arzym ýetirsin,
Yşk oduna köýdüm gitdim köz bile.
Gelip, eli bile odum öçürsin,
Ýogsa sönmez baran bile, buz bile.

Gelen geçdi, gelejege ýurt goýdy,
Aşnalygy namart açdy, mert goýdy,
Ýar synamda dag üstünde dert goýdy,
Dert üstüne burç goýupdyr duz bile.

Magşugym tapdyrmaz, tapsam, el bermez,
Ykbalym oýanmaz, bagtym hem turmaz,
Ýürek hem ynjalmaz, köňül hem durmaz,
Dost jemalyn görmeginçä göz bile.

Bir derde duşup men, hiç kimse bilmez,
Isa aňmaz, Lukman çäresin kylmaz,
Geler – turmaz, duman başdan sowulmaz,
Her zaman bir dert egser men söz bile.

Müň yşk ile maly-dünýä ýygar sen,
Bir şaýy çün ýüz köňüle deger sen,
Dünýä – derýa, ten bir saldyr, agar sen,
Haçana deň taý gider sen düz bile.

Bu dünýä malyndan kim eltdi bir zat,
Owwaly gam-gaýgy, ahyry berbat,
Bolajagyň budur seniň, adamzat,
Ýok bolar sen toprak bile, toz bile.

Magtymguly, ne menzildir, durar sen,
Ýurt kimiňdir, agyr işler gurar sen,
Kysmat olsa, garyş ýere girer sen,
Nesip etse, alty arşyn biz bile.