Köňül bir beden şahydyr,
Her söz köňül joşundadyr.
Ýedi yklymyň tagtynda,
Her biri bir işindedir.

Daglaryň çykyp-inmesi,
Çohlaryň göçüp-gonmasy,
Dünýäniň agyp-dönmesi,
Pelegiň gerdişindedir.

Kimdir bu dünýäde galan,
Maňa çyndyr, size ýalan,
Bir akdyr, bir gara ýylan –
Süleýmanyň gaşyndadyr.

Degresi zümerret daşly,
Ner babaly, kerk gardaşly,
Altyn tagtly, almaz täçli,
Döw begleri daşyndadyr.

Aýlanar, geçer eýýamlar,
Gojalar gurlan eýwanlar,
Gündiz ýara aşna janlar,
Gije ýatsa, düýşündedir.

Üç essesi däli derýa,
Bir esse ýerde müň gowga,
Kim biler bu köne dünýä,
Ýa, Rep, niçe ýaşyndadyr?!

Magtymguly diýr, haraýdyr,
Ajal okdur, pelek ýaýdyr,
Dünýä bir gahba heleýdir,
Adamzadyň daşyndadyr.