Gapyl adam, gam astynda ýatyp sen,
Ötdi ömrüň uşak-düşek kär bile.
Dünýä mardyr, ýassanyp sen, ýatyp sen,
Ynjalarmy bile ýatan mar bile?

Iman gazan, ynsabyňy ýuwtmagyl,
Göre-bile, özüň oda atmagyl,
Munda bidar geçewergil, ýatmagyl,
Munça dözüp ýatajaksyň gör bile.

Her ýan gitseň barar ýeriň gör bolar,
Haýyr gazan, ýatan ýeriň nur bolar,
Ýagşy bolsaň, jaýyň jennet-hüýr bolar,
Ýaman bolsaň, köýdürerler nar bile.

Gözüň ýumduň, senden aýrylar malyň,
Ölensoň diriler ne biler halyň,
Ýagşy-ýaman, her ne eden agmalyň,
Garşyň alyp durar mydam bar bile.

Asly kapyr musulmana gatyşmaz,
Çyn musulman haram işe tokuşmaz,
Menzil kesmez, hiç bir ýana ýetişmez,
Başçy tutup, ýola giren kör bile.

Ömrüňe aldanma, ötene ýanma,
Malyňa guwanma, mülke daýanma,
Munda bet işleme, onda utanma,
Hasap güni haýryň alyp bar bile.

Magtymguly, dogry söze ten bergil,
Sogap mundan ötmez, tapsaň, nan bergil,
Köňlüň tapan dost ýolunda jan bergil,
Işiň nedir seni diýmez ýar bile.