Gara daşdan gara gyly saýlan göz,
Çöňňeler görejiň, göze myhmandyr.
Gelen aş diýp gelmez, turşutmagyl ýüz,
Nana mätäç däldir, söze myhmandyr.

Agyrdyr heňňamlar, uzakdyr ýollar,
Soraşsa ýigitler, sözleşse diller,
Baharda açylar reňbe-reň güller,
Bir pasyl açylar – ýaza myhmandyr.

Ne azym hünärler, ne syrly işler,
Ne howaly daglar, belent agaçlar,
Altmyş elwan, ýetmiş dürli iýmişler,
Agaçdan aýrylar, güýze myhmandyr.

Ýigidiň bolmasa ýaragy, aty,
Şuny belli biliň, ýokdur gaýraty,
Gojaldykça, gider süňňüň kuwwaty,
Ýigitligiň zory dyza myhmandyr.

Bu dünýä ýüzüňe gülüm-gülümdir,
Pişesi jepadyr, jebr-u zulumdyr,
Her niçe ýaşasaň, ahyr ölümdir,
Eziz janlar tende bize myhmandyr.

Haky ýada salsaň, Hakdan gorkyňa,
Şeýtan ara düşer, goýmaz erkiňe,
Guba juwan, guwanmagyl görküňe,
Gojalar sen, görküň ýüze myhmandyr.

Magtymguly, aýdar, aýyp özümde, 
Ölüm ýadymdadyr, gorky gözümde,
Her niçe ýaşasaň ýeriň ýüzünde,
Adam ogly bäş gün duza myhmandyr.