Iller, heý, Mejnun dagynyň,
Serinden duman gitmezmiş.
Müňküre bilin bereniň,
Köňlünden güman gitmezmiş.

Goýna gardaş bolmaz gurtdan,
Dileg etme her namartdan,
Tä ölinçä goç ýigitden,
Myzrak, tir, keman gitmezmiş.

Gapyl adam ogly bilmez,
Ölümini ýada salmaz,
Malyň-mülküň yssyg kylmaz,
Ýanyndan iman gitmezmiş.

Ahyrzamana bolanda,
Ýeri, gögi suw alanda,
Alladan gaýry ölende,
On sekiz mekan gitmezmiş.

Ýer bilen gökden kuwwatly,
Şol Ezraýyldan haýbatly,
Bäş kişiniň Haryş atly,
Öňünden ýylan gitmezmiş.

Aşyklar terki-jan etsin,
Gözde ýaşyn rowan etsin,
Goç ýigitler yhsan etsin,
Yhsany reýgan gitmezmiş.

Magtymguly, galgyn derde,
Işiň düşinçä namarda,
Kyýamat güni jomarda,
Dowzahdan zyýan ýetmezmiş.