Hozuň daş postuny, azergun güli,
Suwun saça çalsaň, gara reň bolar.
Içiň şerden sakla, gybatdan dili,
Saklamasaň köňül gözgiň zeň bolar.

Her kişi kim, ýamanlyga kast eýlär,
Iki dünýä öz işine kest eýlär,
Ýagşy gylyk duşmanyňy dost eýlär,
Gylygyň bet bolsa, işiň jeň bolar.

Ýigidiň bolmasa, sözde keseri,
Eýmençdir, aýrylmaz aýakdan seri,
Her kimde bolmasa iman eseri,
Ýüregi erimez, syýa seň bolar.

Adam ogly awaradyr, asydyr,
Bir söz diýseň ýagşy äre, besidir,
Bilip bolmaz Hakyň dosty haýsydyr,
Alkyşy köp alsaň, işiň oň bolar.

Magtymguly, sözüm gysga, şerhi köp,
Bilmeze hiç, bilen ýanda nyrhy köp,
Ýeriň ýerden, äriň ärden parhy köp,
Müşgil budur – sözleşende deň bolar.