Eý, ýaranlar, musulmanlar,
Gelip-geçmeli dünýädir.
Gurby ýeten ýigitlere,
Döküp-saçmaly dünýädir.

Hiç kim munda tutmaz orun,
Saglykda döküp-saç baryn,
Maly ýygnap, nätdi Karun,
Taşlap gitmeli dünýädir.

Adam ogly, bil, öler sen,
Bu dünýäniň gamyn iýr sen,
Munda düşek gaty diýr sen,
Ýerni guçmaly dünýädir.

Zulum ýagar başlaryňa,
Awy goşar aşlaryňa,
Munda eden işleriňe,
Hasap bermeli dünýädir.

Magtymguly, okyp Kuran,
Hudadan dilegil iman,
Her ýigit ölse binyşan,
Orny öçmeli dünýädir.