Dogama duş gelen gögerer gül dek,
Gülüň möwsümi dek döwran tapylmaz.
Gahrymyň ataşy köýdürer kül dek,
Kül ornundan gaýdyp bossan tapylmaz.

Köňül mysapyrdyr, jeset ýurtdadyr,
Janym joşgundadyr, ýürek dertdedir,
Küýüm kämildedir, gözüm mertdedir,
Şum şertämden hiç bir merdan tapylmaz.

Köňül goýgul gözel Alla küýüne,
Meşgul bolup ýatma mala, oýuna,
Adamzat myhmandyr dünýä öýüne,
Bir gün öý içinde myhman tapylmaz.

Gaflat içre gapyl ýatma, turawer,
Her ne berseň, öz eliň-le berewer,
Dirilikde ölüm işin görewer,
Bir gün jeset içre bu jan tapylmaz.

Köňül awlaýyn diýp ugrasam her ýan,
Dawadyr, döwüşdir, käýiş tapar jan,
Aýdylmaz nesihat, okalmaz Gurhan,
Jana ýakar edep-erkan tapylmaz.

Dergähe dogam köp, nalyşym bihet,
Täleýim zebundyr, tenim bikuwwat,
Gaçgynym köplükdir, istegim hylwat,
Maňa hiç bir jaýy-pynhan tapylmaz.

Magtymguly, jan takdyra ten berdi,
Her kim özün saklaý bilse, iş gördi,
Haý, ne ýaman zatdyr, aňlamaz derdi,
Jahyllyk derdine derman tapylmaz.