Köňül aýdar: halkdan galyp,
Gezsem daglar-daşlar bile.
Ýazygymy ýada salyp,
Ýüzüm ýuwsam ýaşlar bile.

Her kim, görsem, bir pişede,
Meniň köňlüm endişede,
Köýi-ser içre köşede,
Otursam agaçlar bile.

Garry dünýä al içinde,
Adamzat hyýal içinde,
Jahan galmagal içinde,
Her kim ýüz talaşlar bile.

Allanyň yşkynda mestler,
Duş gelişmez zeberdestler,
Köňül perwaz urar, dostlar,
Durmaz ýüz alaçlar bile.

Köp küýler bile oturdym, 
Bilmedim, ne iş bitirdim,
Gümra bolup, ýol ýitirdim,
Oturdym biweçler bile.

Bikär goýma ömür tagty,
Oýandyrsak uýmuş bagty,
Doga kylyp, säher wagty,
Nalyş kylsam guşlar bile.

Magtymguly, towfyk alsam,
Bir är tapsam, gulluk kylsam,
Ýürek aýdar: ýoldaş bolsam,
Dem çeken derwüşler bile.