Bu dünýä bazygärdir,
Bazysyn çaldy gitdi.
Gümra etdi niçäni,
Ýoldaş diýp aldy gitdi.

Akyl, pikr et her haçan,
Ýüz gonan bar, ýüz göçen,
Tagty asmandan uçan,
Süleýman öldi gitdi.

Ýa, mürewwetli şahym,
Umydym, kyblagähim,
Munça ýygdy Ybrahym,
Niçe nan aldy gitdi.

Jigerin daglaý-daglaý,
Zünnaryn baglaý-baglaý,
Niçeler aglaý-aglaý,
Niçeler güldi gitdi.

Niçeler güle dönmüş,
Gül ýanmyş, küle dönmüş,
Niçeler guma dönmüş, 
Niçeler soldy gitdi.

Galar sen görde bagly,
Belli bir ýurda bagly,
Bihuda, adam ogly,
Ýygar sen, galdy gitdi.

Akmaklyk bilen özüm,
Bilmeý sözlärin sözüm,
Magtymguly diýr, gözüm,
Gan ýaşa doldy gitdi.