Zalym pelegiň golundan,
Aşyklarda at galmady.
Gara zeminiň pälinden,
Uzak ömür, zat galmady.

Pelek saldy bu teşwişi,
Apatdyr her tutan işi,
Dargady ärler geňeşi,
Uly jemagat galmady.

Pelek ne gün başa saldy,
Ýürek ýagym, nurum aldy,
Ilat ähli «alym» boldy,
Bizde nesihat galmady.

Pelek eýleme bahana,
Zulm eýlediň geda, hana,
Açyk göwün ýok myhmana,
Pirlere hormat galmady.

Dagymda bent galdy siller,
Gitdi huşum, egri biller,
Magtymguly aýdar, iller,
Yzymda zürýat galmady.