Seniň dek Kadyrdan dileg dilärin,
Rehm eýleýip, ýagmyr ýagdyr, Soltanym.
Garybam, gamgynam, nalyş eýlärin,
Rehm eýleýip, ýagmyr ýagdyr, Soltanym.

Kadyr Alla dökgün nusrat barany,
Ekiniň hemdesti, ýeriň ýarany,
Ýeriň, gögüň, Arşyň, Kürsüň Suhany,
Rehm eýleýip, ýagmyr ýagdyr, Soltanym.

Bilbiller mest bolsun, älem aýylsyn,
Gaýgylar dep bolsun, gamlar sowulsyn,
Nowşirwan wagty dek jahan ýaýylsyn,
Rehm eýleýip, ýagmyr ýagdyr, Soltanym.

Rehmetiň işigi arşdan açylsyn,
Nuruň insin, ýer ýüzüne saçylsyn,
Gubar öçsün, älem ýüzi açylsyn,
Rehm eýleýip, ýagmyr ýagdyr, Soltanym.

Älem takdyr gözlär, Takdyr permany,
Jahany bast eýle, çyksyn armany,
Senden biter dertlileriň dermany,
Rehm eýleýip, ýagmyr ýagdyr, Soltanym.

Bendeýi-permanam, ne bardyr mende,
Rahym Sen, Rahman Sen, kerem kän Sende,
Keremiň bolmasa, galdyk dermende,
Rehm eýleýip, ýagmyr ýagdyr, Soltanym.

Dergähden dilener nalyşly gullar,
Mynajat eýleýip, açylar diller,
Ýamanlyk göterlip, ýaýylsyn iller,
Rehm eýleýip, ýagmyr ýagdyr, Soltanym.

Magtymguly, yşkyň eýlär erada,
Yşkyňy kemal et, goýma arada,
Ýetirgin maksada, magşar − myrada,
Rehm eýleýip, ýagmyr ýagdyr, Soltanym.