Janym biziň, Soňudagy,
Dagdanlydyr biliň seniň.
Duşman görse dudylaşar,
Ýomut, gökleň iliň seniň.

Oýlukda[1] ýaýlany gursak,
At çapdyryp, baýrak bersek,
Temetede[2] orak orsak,
Aş dökmek hyýalyň seniň.

Kesgiç-kesgiç baýyr geçer,
Gyzylbaýyr göwün açar,
Sowuk çeşme suwuň içer,
Şonda dürli malyň seniň.

Dürli-dümen otuň biter,
Her deräň bir ile ýeter,
Hatarlanşyp kerwen öter.
Naýbadaýdyr[3] ýoluň seniň.

Magtymguly set açanda,
Bu döwran senden geçende,
Üstüňden iliň göçende,
Niçik geçer halyň seniň?

[1] Oýluk - ýer ady.

[2] Temete - ýer ady.

[3] Naýbadaý - geçelge ady.