Goldan aldyň kararymy,
Gelip sen nägehan, pyrak.
Göterdiň Meňli ýarymy,
Goýup janda arman, pyrak.

Gözlerim ýolunda bende,
Ne ygtyýar galdy mende,
Eýläp jebir gelen günde,
Sere saldyň pygan, pyrak.

Arzymy diňlemez şahym,
Batdy asmandaky mahym,
Daglary ýandyryp ahym,
Baryn kyldy weýran, pyrak.

Galmaz meniň başym aman,
Gören jebrim diýer zyban,
Günde gelip Isa, Lukman,
Tapmaz derde derman, pyrak.

Zülpükarym aldyň goldan,
Aýyrdyň bir ýalňyz saldan,
Ilim habar sormaz haldan,
Zyňdyň baryn Eýran, pyrak.

Oksuz galdy golda ýaýym,
Batdy meniň Günüm, Aýym,
Goldamasaň Sen, Hudaýym.
Kylar meni gurban, pyrak.

Magtymguly zar aglaýyp,
Jigerin nara daglaýyp,
Ol Meňli ýarym çaglaýyp,
Her gün çekdir efgan, pyrak.