Mert ýigit mert ärden öner,
Namart asyl-ha mert bolmaz.
Gurduň gözünde ot ýanar,
Şagal-tilkiler gurt bolmaz.

Sözlegil bileniň dilden,
Bilbil aýra düşse gülden,
Eşit adam, dogan ilden,
Gaýry mähriban ýurt bolmaz.

Bu älem ajaýyp bolsa,
Dünýä ýüzi nurdan dolsa,
Ozal Taňry rehim kylsa,
Ne ten, ne janda dert bolmaz.

Magtymguly, akyl-huşuň,
Akdy gözden ganly ýaşyň,
Ellä ýetdi gamly başyň,
Mundan gaýry perýat bolmaz.