Ýurdum Etrek, ilim gökleň,
Men bir söwer ýar gözlär men.
Jan şährine düşdi talaň,
Kuwwat beren pir gözlär men.

Aýryldym ene-atadan,
Gözüm guwanjy-watandan,
Jan bermek asan hijrandan,
Haryt köp, bazar gözlär men.

Mämmetsapadyr gardaşym,
Molla Matam sapakdaşym,
Abdylla gelse basdaşym,
Pygamber nazar gözlär men.

Ýüregimde ençe pygan,
Gözden akdy bulaklap gan,
Syrdaş imes pelek-döwran,
Gaçsam diýp, mazar gözlär men.

Soňudag, guwanjym meniň,
Gezip men seriňde seniň,
Saýýat men awlap jereniň,
Syýa ýylçyr mar gözlär men.

Magtymguly, bu kyýamat,
Goýdy başyma çoh apat,
Türkmen ilim, eý, adamzat,
Azat sil, güzer gözlär men.