Bazarym sowuldy, harydym galdy,
Dükanym eýesiz galdy, neýläýin?
Penasyn dargatdy, garakçy doldy,
Barçasyn düýrleýip aldy, neýläýin?

Mertler namart boldy, namart mert boldy,
Gurtlar peşe boldy, peşe gurt boldy,
Ýurtlar weýran boldy, zyndan ýurt boldy,
Şum pelek leşgerin saldy, neýläýin?

Aşyklardan ötdi yşkyň höwesi,
Tartyldy, ýazyldy dowzah perdesi,
Dagdan aşyp gyzylbaşyň ordasy,
Gözel ilim weýran kyldy, neýläýin?

Ýar-ýardan aýyrdy, merdi ilinden,
Derýany guratdy, dagy silinden,
Bagy − serwisinden, bilbil − gülünden,
Gan ýyglaýyp, jyda boldy, neýläýin?

Mahrum kyldy gözel görküň hünärin,
Ata-enäň aldy göwün kararyn,
Her gün açdy gul-gyrnagyň bazaryn,
Namysym bazara saldy, neýläýin?

Magtymguly, goly bagly, perişan,
Ajap dessanymdan goýmady nyşan,
Zyndanda oturdy pirlerimiz, işan,
Idegim kerwenden ýoldy, neýläýin?