Goç ýigidiň ady çykmaz,
Döwleti-maly bolmasa.
Endişeli iş bitirmez,
Meýdanda däli bolmasa.

Bolmasa ýigdiň zürýady,
Ölende tutulmaz ady,
Tutaşmaz synanyň ody,
Başda hyýaly bolmasa.

Almaz[1] guşlar awa çapmaz,
Hünärsiz öz syrtyn ýapmaz,
Märekede orun tapmaz,
Akly-kemaly bolmasa.

Gonmak täze ýurda ýagşy,
Haly düşek törde ýagşy,
Ol ýigitler görde ýagşy,
Başy gowgaly bolmasa.

Magtymguly, bolsa başly,
Uýalmaz gylyçly, aşly,
Duzy zor, duşmany güýçli,
Dosty wepaly bolmasa.

[1] Bu ýerde algyr däl guşlar, aw awlamaga ussat bolmadyk guşlar göz öňünde tutulýar.