Dok dokuşar sigse hylgat geýmäge,
Kilim gözel zatdyr don tapylmasa.
Aç dyrryşar gaty nany iýmäge,
Müşgildir bişire un tapylmasa.

Hasyl umydy bar ekin ekene,
Bu işler mälimdir mähnet çekene,
Aýak ýalaň basa bilmez tikene,
Neýlesin geýere gön tapylmasa.

Akylsyzlar iş ahyryn garamaz,
Jolban çigidinden garpyz döremez,
Agyr mejlislere çopan ýaramaz,
Neýlesin otyra jim tapylmasa.

Ýigitlikde her kim eşretde ýaýlar,
Başyna ýa geler, gelmez bu köýler,
Dişsizler nan tapsa çäresin eýlär,
Müşgildir iýere nan tapylmasa.

Magtymguly söýmez jedeli, jeňi,
Ahyret azm etdi köp duşy-deňi,
Dünýäde ne iş bar – bolmaýyr soňy,
Muşakgatdyr tende jan tapylmasa.