Ahmet patyşadan habar tutmaga,
Umyt etdi iller Çowdur han üçin.
Sag baryp, salamat gaýdyp gelmäge,
Oňmady ykballar Çowdur han üçin.

Baglar doňup galdy, ýagyşlar gezmän,
Bulut böklek saldy, bu derde dözmän,
Zemin zaýa boldy, pelekler lerzan,
Jennet boldy çöller Çowdur han üçin.

Kaza gahra mündi – perin syndyrsa,
Pelek hyýal etdi – mährin indirse,
Derýa joşa geldi – suwdan gandyrsa,
Muştak boldy köller Çowdur han üçin.

Yzyňda galdylar il intizaryň,
Umyt bilen gezdi Annahal ýaryň,
Atanazar boldy çekere zaryň,
Gözleý-gözleý ýollar Çowdur han üçin.

Barsa, paýy belli soltanda-handa,
Iller bilmeý galdy – armany janda,
Kazadyr, kysmatdyr Ýezdde, Kermanda,
Meger tartdy ganlar Çowdur han üçin.

Gurralar güň boldy, pallar şum boldy,
Baranlar bent boldy, ýollar bim boldy,
Çeşmeler höşk boldy, daşlar mum boldy,
Göýä boldy diller Çowdur han üçin.

Söýle, Magtymguly, älem bilsinler,
Jaýy jennetdedir, güwä bolsunlar,
«Hak rehmet etsin!» diýp, doga kylsynlar,
Tamam ulus-iller Çowdur han üçin.